Wednesday, February 28, 2024
More

    QM Oo Ku Eedaysay Turkiga Inay Ku Xad-gudubtay Cunaqabateynt Hubka Ee Soomaaliya

    (CKG)- Baarayaasha Qaramada Midoobay ayaa soo gabagabeeyay baaristooda ku aadan in Turkiga uu ku xad-gudbay cunaqabateynta caalamiga ah ee saaran Soomaaliya, kadib markii uu keenay Soomaaliya diyaarado hubeysan oo aan la socon UN-ka, sida uu sheegay Nordic Monitor.

    Sida laga soo xigtay guddiga khubarada arrimaha Soomaaliya ee u kuurgala xaaladda colaadeed ee Soomaaliya, iyadoo la raacayo go’aankii Golaha Ammaanka ee Qaramada Midoobay, Turkigu waxaa lagu eedeeyay inuu ku xadgudbay cunno-qabteynta hubka ee Qaramada Midoobay, kaddib markii uu Soomaaliya keenay diyaaradaha Drones-ka ee Bayraktar oo hubaysan, kuwaasoo ay farsamaysay shirkad ay leeyihiin qoyska Madaxweynaha Turkiga Recep Tayyip Erdoğan.

    Xogta sirta ah ee ay heleen baarayaasha Qaramada Midoobay ayaa tilmaamaya in Turkiga uu Muqdisho soo gaarsiiyay diyaaradaha Bayraktar TB2 December 6, 2021 iyada oo lagu daabulay laba diyaaradood oo nooca xamuulka qaada ah ee Airbus A400M oo ay maamulaan ciidamada cirka Turkiga.

    Dowladda Turkiga ayaa lagu eedeeyay inay ku guuldareysatay inay u gudbiso Qaramada Midoobay warbixin daahfuran ka hor inta aysan dirin diyaaradaha aan duuliyaha lahayn inkastoo ay xaqiiqadu tahay in qaraarka golaha ammaanka ee Qaramada Midoobay uu si cad u qeexayo ogolaanshahan ka hor inta aan wax hub ah la keenin Soomaaliya.

    Turkiga oo ka jawaabaya warqado baaritaan ah oo ka soo baxay Qaramada Midoobay ayaa ku andacoonaya in diyaaradaha aan duuliyaha lahayn ay geeyeen saldhigga Turkiga ee Muqdisho, ujeedkuna uu yahay ka qeyb qaadashada dagaalka lagula jiro argagixisada.

    Warbaahinta Turkiga ayaa sheegtay in saraakiil Soomaali ah uu tababar ku saabsan habka loo isticmaalo diyaaradaha aan duuliyaha lahayn uga socday dalka Turkiga horraantii bishii Maarso ee sannadkii 2021-ka, waxaana la sheegay in gacanta loo galiyay shan diyaaradood oo kuwa aan duuliyaha lahayn ah, taasoo caqabad ku noqotay sheekada rasmiga ah ee dowladda Turkiga ee ah in diyaaradaha aan duuliyaha lahayn ee Soomaaliya jooga loogu talagalay in ay isticmaalaan ciidamada Turkiga ee Soomaaliya.

    Kooxaha Qaramada Midoobay ayaa kormeeray oo diiwaan-galiyay hubka iyo rasaasta ay dowladda Soomaaliya si rasmi ah u soo dejisay tan iyo markii qayb ka mid ah laga qaaday cunno-qabteynta hubka sannadkii 2013-kii.

    Soomaaliya ayaa heshay ilaa 27,000 oo hub ah iyo 80.1 milyan oo rasaas ah, oo ay ku jiraan ilaa 70,000 oo RPG-7, tan iyo 2013kii.

    WARARKA LA XIRIIRA

    LEAVE A REPLY

    Please enter your comment!
    Please enter your name here

    KU BIIR ASXAABTA BARTA FACEBOOGEENA

    LATEST HEADLINES

    Social Media Auto Publish Powered By : XYZScripts.com