Jowhar (CKG) – Madaxweynaha Dowlad Goboleedka Hirshabeelle, Mudane Cali Guudlaawe Xuseen ayaa Shir guddoomiyey Kulanka Golaha Wasiirrada Hirshabeelle oo lagu qabtay Magaalada Jowhar.
Shirkan ayaa maanta looga hadlay Arrimaha amniga, Wajiga labaad ee Howlgallada ka dhanka ah Al-Shabaab oo dhowaan bilaaban doono, Shirkii Golaha Wadatashiga Qaran iyo Heshiiskii Siyaasadeed ee Magaalada Muqdisho lagu soo gaaray iyo Dakhli kordhinta horumarinta hanaanka maaliyadeed ee Hirshabeelle.
Cali Guudlaawe ayaa Golaha Wasiirrada Hirshabeelle uga warbixiyay Shirkii Golaha Wadatashiga Qaran ee uu Magaalada Muqdisho uga qeybgalay 24-27 bishii May.
Wuxuu Madaxweynaha Hirshabeelle sheegay in muhiimada ugu wayn ee shirkaas uu ahaa dardargalinta howlgallada lagula dagaalamayo Al-Shabaab iyo arrimaha doorashooyinka waxa uuna xusay in dood dheer ay ka yeesheen hanaanka doorashooyinka dalka ay ugu dambeyn isla qaatay in la mideeyo doorashooyinka Dowladaha Xubnaha ka ah Dowladda Federaalka oo u dhici doonta doorasho qof iyo cod ah.
Wasaarada Arrimaha Gudaha iyo Dowladaha Hoose ayaa Golaha hor keentay Hindise Sharciyeed Degmooyin loogu aqoonsanayo Deegaano soo buuxiyay shuruudihii Degmo-nimo kuwaas oo kala ah;
- Moqokori
- Masaajid Cali Gaduud
- Raaga Ceelle
- Buurweyn
- Buq-aqable
- Xawaadley
Golaha Wasiirrada maamulka Hirshabeelle ayaa dood iyo falanqeyn dheer kadib, si cod aqlabiyad ah ku ansixiyay degmooyinkaasi Lixda ah.
CodkaKoonfurGalbeed.com
