Galgaduud (CKG) – Ciidanka Xoogga Dalka Soomaaliyeed oo kaashanaya dadka deegaanka ayaa subixii Talaadada maanta ah si guul ah u fashiliyay isku day weerar oo ay Al-Shabaab ku soo qaaday magaalada Masagawaay oo hoostagta degmada Ceeldheer ee Gobalka Galguduud oo dhawaan laga xorreeyay.
Ciidamada Xoogga Dalka oo si buuxda ula socday dhaqdhaqaaqa Al-Shabaab iskuna diyaariyay fashilintooda ayaa si xirfad iyo geesinimo leh u kala cayriyay Shabaabka halkaas soo weerartay.
Inta uu socday hawlgalka fashilintu waxa ay Ciidamada Xoogga Dalka toogteen in ka badan 30 ka tirsan argagixisada Al-Shabaab soo duulaanka tagtay, kuwaas oo ay ka carareen maydadkooda.
Sidoo kale, Ciidamada xoogga dalka ayaa waxa ay gacanta ku soo dhigeen saddex ka mid ah gaadiidkii ay ku soo duulaan tageen Al-Shabaab iyaga oo gubay mid kale.
Howlgalkan ayaa waxaa ku dhaawacmay saddex ka mid ah Ciidamada Xoogga Qaranka, sida ay baahisay warbaahinta dowladda.
Waxaa socda hawlgal lagu baacsanayo firxadka maleeshiyaadka Ururka Al-Shabaab ee la jabiyay.
CodkaKoonfurGalbeed.com
