Baydhabo (CKG)- Munaasabad uu xilka kula wareegayey Agaasimaha guud ee Wasaaradda Qorsheynta Koonfur Galbeed oo dhacday Xarunta dhexe ee Wasaaradda Qorsheynta, Maalgashiga iyo Horumarinta Dhaqaalaha Dowlad Goboleedka Koonfur Galbeed Soomaaliya ayaa Maanta Kusimihii Agaasinka Guud ee Wasaaradda Mudane Maxamed Yaraani Xasan si rasmi ah xilka ugu wareejiyay Agaasimaha cusub Mudane Yacquub Isxaaq Xuseen oo dhawaan xilkan loo magacaabey.
Xaflad kooban oo loo qabtay xilwareejintan ayaa waxaa goob joog ahaa Masuuliyiinta ugu saraysa Guddiga Shaqaalaha Rayidka DGKGS oo uu hogaaminaayo Guddoomiyaha Guddiga Mudane Sharmaarke Maxamed Kuulow iyo Wasiirka Wasaaradda Qorsheynta. Sidoo kale, waxaa ka soo qeyb-galay Munaasabadda qaar kamid ah Agaasimayaasha Guud ee Wasaaradaha Dowladda iyo Marti sharaf kale.
Maxamed Yaraani, kusimihii Agaasinka ayaa madasha ka sheegay inuu aad ugu faraxsan yahay xilwareejinta, wuxuuna ka sheekeeyay waxqabadkii Wasaaradda Qorsheynta mudadii uu xilka haayay ee halka sano ahayd.
Dhanka kale, Agaasimaha Cusub ayaa mahad celin kadib sheegay inuu isna aad uga faraxsan yahay la wareegida Xilka Agaasinka Guud ee Wasaaradda. Wuxuuna ballan qaaday inuu si dhow ula shaqeyn doono Madaxda Wasaaradda oo ay ugu horeeyaan Wasiirada iyo Shaqaalaha ka shaqeeya Wasaarada.
Guddoomiyaha Guddiga Shaqaalaha Rayidka Dowladda Koonfur Galbeed Soomaaliya Mudane Sharmaarke Maxamed Kuulow oo hadal kooban ka jeediyay halkaas ayaa kula dardaarmay Agaasimaha cusub inuu noqdo mid ilaaliya mabaa’ida iyo Shuruucda Hagaysa Shaqalaha Dowladda, wuxuuna Alle uga baryay inuu la garab galo Masuuliyadda weyn uu Maanta la wareegay.
Codkakoonfurgalbeed.com
